白话广州◎梁倩薇编辑4月8号凌晨，花都发生1.9级地震。咁轻微嘅震级，连大卡车开过都分分钟劲过佢。所以，如果唔系中国地震台网报出来，大部分人基本无感。不过，就算有感，好似前两年河源发生咗起码4次4级以上地震，好多人都感觉到，但系基本上都反应镇静。唔似其他地方，可能会发生恐慌性抢购，或者谣言弥漫，搞到七国咁乱……但广州一般唔会，面对非典、地震、台风呢类天灾，广州人通常都比较淡定嘅。呢份性格嘅养成，同地缘关系好大。呢一方水土真不愧为福地，两千几年嚟，大灾大难相对比较少。就讲地震，1983年，南越王墓喺象岗山出土。考古学家发现，呢座建成20个世纪嘅墓地，至今石墙、门框完整，冇发现沉降开裂现象，可见咁多年来，佢都冇经历过可怕嘅大地震。此外，广州天然资源比较多，因为地处亚热带，物产丰富；植物种类达数千种，野生动物大概有两百几种，矿种有五十几个。而且，广州海路开阔，系海上丝绸之路重要节点，来往贸易频繁。因此，人要喺本地揾食生存并唔算难。有咗呢啲物质基础，人就比较容易形成心理上嘅安全感，相信无论发生乜嘢事，大自然都会给予自己充分嘅支持……于是，广州人淡定嘅性格，就喺两千几年喺风雨同晴好之中，慢慢建立起来啦。